शेतकऱ्यांच्या सुरक्षेसाठी सरकारकडून ठोस उपाययोजना; ‘बलराम कृषी महोत्सवा’तून मुख्यमंत्र्यांचा संवाद
जबलपूर | सद्वार्ता
शेती आणि शेतकऱ्यांच्या हिताचे संरक्षण करण्यासाठी मध्य प्रदेश सरकार पूर्णपणे कटिबद्ध असून, शासकीय योजनांच्या निर्मितीसाठी कृषी जमिनीचे अधिग्रहण करण्यात आल्यास संबंधित शेतकऱ्यांना एक-दोन नव्हे तर चारपट मोबदला दिला जाईल, अशी ग्वाही मुख्यमंत्री डॉ. मोहन यादव यांनी दिली.
मुख्यमंत्री डॉ. यादव मंगळवारी मंत्रालयातून भोपाल येथील करोंद कृषी उत्पन्न बाजार समिती परिसरात आयोजित ‘बलराम कृषी महोत्सवा’ला व्हिडिओ कॉन्फरन्सिंगद्वारे संबोधित करत होते.
यावेळी त्यांनी शेतकऱ्यांना आपली जमीन शक्यतो सुरक्षित ठेवण्याचे आवाहन केले. “भूमी ही आपली माता आहे. ती आपले पालन-पोषण करते. त्यामुळे ती कोणालाही विकू नका,” असे आवाहन त्यांनी केले.
मुख्यमंत्री म्हणाले की, शेतकऱ्यांची शेती सरकारसाठी देवस्थानासमान आहे आणि शेतकऱ्यांच्या शेतातील प्रत्येक धान्य सरकारसाठी प्रसादासारखे आहे. शेतकऱ्यांच्या कष्टाच्या प्रत्येक थेंबाचा सन्मान करण्यासाठी सरकार सदैव त्यांच्या पाठीशी आहे.
‘बलराम कृषी महोत्सव’ हा शेतकऱ्यांच्या मेहनतीचा, समर्पणाचा आणि कृषी क्षेत्रातील त्यांच्या महत्त्वपूर्ण योगदानाचा गौरव करण्याचे माध्यम असल्याचे त्यांनी सांगितले. यावेळी मुख्यमंत्री डॉ. यादव यांनी व्हिडिओ कॉन्फरन्सिंगद्वारे उपस्थित शेतकऱ्यांशी संवाद साधला.
“तुमचा आनंद आमच्यासाठी होळी आणि सर्वांत मोठी दिवाळी आहे,” असे सांगत त्यांनी शेतकऱ्यांना मोठ्या उत्साहाने कृषी महोत्सवात सहभागी होण्याचे आवाहन केले.
मुख्यमंत्र्यांनी सांगितले की, राज्यातील सर्व जिल्ह्यांमध्ये ‘बलराम कृषी महोत्सव’ आयोजित करण्यात येत असून, मागील 26 दिवसांमध्ये हा राज्यातील 14वा महोत्सव आहे. लवकरच भोपाल मुख्यालयातही मोठ्या कृषी महोत्सवाचे आयोजन करण्यात येणार आहे.
‘कवच’ योजनेतून शेतकऱ्यांना आर्थिक सुरक्षा
शेतकऱ्यांना आर्थिक सुरक्षा देण्याच्या उद्देशाने सरकारने ‘कवच’ योजना सुरू केली आहे. या योजनेच्या माध्यमातून सहकारी खात्यांमधील जुन्या त्रुटी दूर करून सुमारे 5 हजार शेतकऱ्यांना कर्ज आणि विविध शासकीय योजनांचा लाभ मिळवून देण्यात आला आहे. शेतकऱ्यांना बिनव्याजी कर्ज तसेच कर्ज फेडण्यासाठी पूर्ण 12 महिन्यांचा कालावधी देण्याची व्यवस्था या योजनेत करण्यात आली आहे.
मुख्यमंत्री म्हणाले की, मध्य प्रदेशातील शेतकरी आपल्या मेहनतीच्या जोरावर राज्याच्या कृषी अर्थव्यवस्थेला नवी उंची देत आहेत. डाळींच्या उत्पादनात मध्य प्रदेश देशात आघाडीवर असून, अन्नधान्य उत्पादनात दुसरा, तेलबिया उत्पादनात दुसरा आणि दूध उत्पादनात तिसरा क्रमांक आहे. सेंद्रिय शेती आणि सेंद्रिय कापूस उत्पादनात मध्य प्रदेश देशात प्रथम क्रमांकावर असल्याचेही त्यांनी नमूद केले.
शेतकऱ्यांच्या उत्पन्नाचे स्रोत वाढविणे, शेतीचा खर्च कमी करणे तसेच तंत्रज्ञान आणि नवकल्पनांच्या माध्यमातून उत्पादन व उत्पन्न वाढविण्यावर सरकारचा विशेष भर असल्याचे मुख्यमंत्री म्हणाले.
राज्यात सिंचन क्षमता 100 लाख हेक्टरपर्यंत वाढविणे, उद्यानिकीचे क्षेत्र 30 लाख हेक्टरपर्यंत नेणे आणि 10 हजार नवीन सूक्ष्म अन्नप्रक्रिया उद्योग सुरू करण्याचे लक्ष्य ठेवण्यात आले आहे.
मुख्यमंत्र्यांनी शेतकऱ्यांना पीक विविधीकरण स्वीकारण्यासोबतच उद्यानिकी, नैसर्गिक शेती, पशुपालन आणि मत्स्यपालनाशी जोडले जाण्याचे आवाहन केले. शेतीला केवळ अन्नधान्य उत्पादनापुरते मर्यादित न ठेवता प्रक्रिया, ब्रँडिंग आणि मार्केटिंगशी जोडून शेतकऱ्यांच्या उत्पन्नाचे नवे मार्ग खुले केले जात असल्याचे त्यांनी सांगितले.
स्वातंत्र्यदिनी मुख्यमंत्री डॉ. यादव भोपालमध्ये ध्वजारोहण करणार
जबलपूरमध्ये सार्वजनिक बांधकाम मंत्री राकेश सिंह यांच्या हस्ते ध्वजारोहण
जबलपूर | सद्वार्ता
मध्य प्रदेशचे मुख्यमंत्री डॉ. मोहन यादव 15 ऑगस्ट रोजी स्वातंत्र्यदिनी राजधानी भोपाल येथे आयोजित राज्यस्तरीय समारंभात ध्वजारोहण करून राज्यातील जनतेला संबोधित करणार आहेत. यावेळी राजधानी भोपालसह सर्व जिल्हा मुख्यालयांवर विविध सांस्कृतिक कार्यक्रमांचे आयोजन करण्यात येणार आहे.
विधानसभा अध्यक्ष नरेंद्र सिंह तोमर हे ग्वाल्हेर येथे ध्वजारोहण करतील. उपमुख्यमंत्री जगदीश देवडा मंदसौर येथे, तर उपमुख्यमंत्री राजेंद्र शुक्ल रीवा येथे ध्वजारोहण करतील.
विविध जिल्ह्यांमध्ये मंत्र्यांकडे ध्वजारोहणाची जबाबदारी सोपविण्यात आली आहे. त्यानुसार मंत्री कुंवर विजय शाह खंडवा, कैलाश विजयवर्गीय देवास, प्रल्हाद सिंह पटेल नरसिंहपूर, राकेश सिंह जबलपूर, करण सिंह वर्मा सीहोर, राव उदय प्रताप सिंह छिंदवाडा, संपतिया उईके मंडला, तुलसीराम सिलावट इंदूर, एदल सिंह कंषाना मुरैना, निर्मला भूरिया झाबुआ, गोविंद सिंह राजपूत सागर, विश्वास कैलाश सारंग खरगोन, नारायण सिंह कुशवाह दतिया, नागर सिंह चौहान अलीराजपूर, प्रद्युम्न सिंह तोमर शिवपुरी, राकेश शुक्ला श्योपूर आणि इंदर सिंह परमार शाजापूर येथे ध्वजारोहण करतील.
राज्यमंत्री स्वतंत्र प्रभार कृष्णा गौर टीकमगड, धर्मेंद्र भाव सिंह लोधी दमोह, दिलीप जायसवाल अनूपपूर, गौतम टेटवाल उज्जैन, लखन पटेल विदिशा आणि नारायण सिंह पंवार राजगड येथे ध्वजारोहण करतील.
तसेच रायसेन येथे राज्यमंत्री नरेंद्र शिवाजी पटेल, सतना येथे प्रतिमा बागरी, छतरपूर येथे दिलीप अहिरवार आणि सिंगरौली येथे राधा सिंह ध्वजारोहण करतील.
रतलाम, शहडोल, नर्मदापूरम, धार, बालाघाट, पांढुर्णा, सिवनी, निवाडी, सीधी, बडवानी, मऊगंज, गुना, उमरिया, आगर-माळवा, हरदा, नीमच, अशोकनगर, कटनी, भिंड, पन्ना, बैतूल, डिंडोरी, मैहर आणि बुरहानपूर या जिल्ह्यांमध्ये संबंधित जिल्ह्यांचे जिल्हाधिकारी ध्वजारोहण करतील.
‘सेवा हा आमचा धर्म आणि अंत्योदय हेच अंतिम ध्येय’ : मुख्यमंत्री डॉ. यादव
ज्येष्ठ नागरिकांना पेन्शनचा आधार; बहिणींना रक्षाबंधनाची भेट
मुख्यमंत्री डॉ. यादव यांनी सिंगल क्लिकद्वारे 311 कोटी रुपये लाभार्थ्यांच्या खात्यात केले जमा
जबलपूर | सद्वार्ता
मुख्यमंत्री डॉ. मोहन यादव यांनी मंगळवारी मंत्रालयातून राज्यातील लाखो लाभार्थ्यांच्या खात्यांमध्ये सामाजिक सुरक्षा पेन्शनची रक्कम आणि प्रधानमंत्री उज्ज्वला योजनेअंतर्गत पात्र महिलांना गॅस सिलिंडर रिफिलसाठी प्रोत्साहन रक्कम सिंगल क्लिकद्वारे हस्तांतरित केली. या माध्यमातून एकूण 311 कोटी रुपये लाभार्थ्यांच्या खात्यात जमा करण्यात आले.
या लाभार्थ्यांमध्ये जबलपूर जिल्ह्यातील हजारो लाभार्थ्यांचाही समावेश आहे. त्यापैकी काही लाभार्थी जिल्हाधिकारी राघवेंद्र सिंह यांच्या उपस्थितीत कलेक्ट्रेटमधील एनआयसीच्या व्हिडिओ कॉन्फरन्सिंग कक्षातून राज्यस्तरीय कार्यक्रमाशी जोडले गेले होते.
राज्यस्तरीय कार्यक्रमानंतर जिल्हाधिकारी सिंह यांनी उपस्थित लाभार्थ्यांना संबंधित योजनांचे मंजुरी प्रमाणपत्र प्रदान केले.
मुख्यमंत्री डॉ. यादव यांनी व्हिडिओ कॉन्फरन्सिंगद्वारे राज्यातील विविध जिल्ह्यांतील लाभार्थ्यांना संबोधित करताना सांगितले की, समाजातील प्रत्येक घटकाच्या विकास आणि कल्याणासाठी सरकार पूर्ण कटिबद्धतेने काम करीत आहे. प्रत्येकाच्या घरात आनंद आणि समृद्धी नांदावी, ही सरकारची भावना आहे.
“सेवा हा आमचा धर्म आणि अंत्योदय हेच आमचे अंतिम ध्येय आहे,” असे मुख्यमंत्री म्हणाले.
त्यांनी सांगितले की, पंतप्रधान नरेंद्र मोदी यांच्या नेतृत्वाखाली गरीब, युवा, महिला शक्ती आणि शेतकरी कल्याणासाठी ऐतिहासिक कार्य केले जात आहे.
35.25 लाखांहून अधिक लाभार्थ्यांना 211.53 कोटी रुपयांची पेन्शन
मुख्यमंत्री डॉ. यादव यांनी सामाजिक सुरक्षा पेन्शन योजनेंतर्गत राज्यातील 35 लाख 25 हजारांहून अधिक पात्र लाभार्थ्यांच्या बँक खात्यांमध्ये 211 कोटी 53 लाख रुपये जमा केले. ही रक्कम जुलै 2026 महिन्याच्या पेन्शनच्या स्वरूपात लाभार्थ्यांच्या खात्यात पोहोचविण्यात आली.
मुख्यमंत्री म्हणाले की, पेन्शनची रक्कम कदाचित कमी वाटत असली तरी त्यातून मिळणारा आधार मोठा असतो. ज्येष्ठ नागरिकांच्या चेहऱ्यावरचे हास्य सरकारला लोककल्याणासाठी आणखी चांगले काम करण्याची प्रेरणा देते.
22.20 लाख बहिणींना गॅस सिलिंडर रिफिलची रक्कम
श्रावण महिना आणि आगामी रक्षाबंधनाच्या पार्श्वभूमीवर मुख्यमंत्री डॉ. यादव यांनी राज्यातील सुमारे 22 लाख 20 हजारांहून अधिक महिलांच्या खात्यांमध्ये एप्रिल आणि मे 2026 या दोन महिन्यांसाठी गॅस सिलिंडर रिफिलची सुमारे 99 कोटी रुपयांची सबसिडी सिंगल क्लिकद्वारे जमा केली.
“सावन हा बहिणींचाच महिना आहे. बहिणी आनंदी असतील तरच घरात उत्साह आणि आनंदाचे वातावरण असते. त्यामुळे रक्षाबंधनाची भेट आम्ही आतापासूनच देण्यास सुरुवात केली आहे,” असे मुख्यमंत्री म्हणाले.
राज्यातील सर्व बहिणींना रक्षाबंधनाच्या शुभेच्छा देताना त्यांनी आनंदाने सण साजरा करण्याचे आवाहन केले. “बहिणींच्या आनंदातच आमचा आनंद आहे आणि त्यांच्या कल्याणात कोणतीही कमतरता ठेवली जाणार नाही,” अशी ग्वाही त्यांनी दिली.
मुख्यमंत्री डॉ. यादव यांनी राज्यातील नागरिकांना हरियाली तीज, स्वातंत्र्यदिन आणि रक्षाबंधनाच्या शुभेच्छा दिल्या. महाकालांच्या कृपेने सर्वांच्या जीवनात सुख, समृद्धी आणि आनंद नांदो, अशी प्रार्थना त्यांनी केली.
तसेच ‘हर घर तिरंगा’ अभियानांतर्गत प्रत्येक नागरिकाने आपल्या घरावर तिरंगा फडकवावा, असे आवाहनही त्यांनी केले.
भोपाल येथील मंत्रालयातून झालेल्या राज्यस्तरीय कार्यक्रमाला अन्न, नागरी पुरवठा व ग्राहक संरक्षण मंत्री गोविंद सिंह राजपूत तसेच सामाजिक न्याय व दिव्यांगजन कल्याण, उद्यानिकी आणि अन्नप्रक्रिया मंत्री नारायण सिंह कुशवाह यांनीही संबोधित केले.
(सद्वार्ता)